2017/05/29 | Maiatzaldia
Iruñea Baiona Maiatzaldiari bukaera borobila emateko Aines Dufaur, IKAS argitaletxeko zuzendariak “Haur literatura, hizkuntza eta heziketa” hitzaldia eskainiko du. Hitzordua, maiatzaren 31n, Karrikiri Elkartean, arratsaldeko 19:00etan da.
IKAS euskal pedagogia zerbitzuak ikastresnak sortzen edo euskaratzen ditu, haur hezkuntzatik helduen irakaskuntzaraino, gai asko hukituz: hizkuntza, matematika, historia-geografia, zientziak…
Ikastetxeetan bereziki idazketa eta irakurketa lantzeko, IKASek haur literaturako albumak euskaratzen ditu edota obrak sortzen, adibidez Haserre gorria, Pello eta otsoa, Dutea trilogia… IKAS mediateka ere bada, eta irakasleei zuzenduriko animazioak antolatzen ditu.
Aines Dufaur, zuzendaria, IKASeko lanaz, haur literaturaz, hizkuntzaz eta heziketaz arituko zaigu heldu den astean.
Honekin itxiko dugu 2017ko Maiatzaldia; 8 ekitaldiz osatutako egitaraua eskaini dugu aurten (hitzaldiak, liburu aurkezpenak, bisita gidatuak, mahai inguruak, irakurketa literarioak, umore saioa eta errezitaldiak). Maiatzaldiaren helburua Iruñea eta Baionaren arteko kultur sorkuntzaren erakusleihoa izatea eta bi hirien arteko kultur harremanak sendotzea izan da.
Hitzaldia: “Haur literatura, hizkuntza eta heziketa”
Hizlaria: Aines Dufaur, IKASeko zuzendaria
Noiz: maiatzaren 31n, arratsaldeko 19:00etan
Non: Karrikiri Elkartea, Xabier karrika 4an
Antolatzaileak: Iruñeko Karrikiri Elkartea eta Zaldiko Maldiko Elkartea; Baionako Maiatz Argitaletxea eta Zizpa Gaztetxea eta Senpereko Hatsa Elkartea.
Babesleak: Iruñeko Udala, Nafarroako Gobernua, Eusko Jaurlaritza eta Euskal Elkargoa.
2017/05/23 | Liburu aurkezpenak, Maiatzaldia
Iruñea Baiona Maiatzaldiarekin jarraitzen dugu, eta bihar arratsaldean, Karrikirin, Mikel Hiribarrenek “Basaburuko altxorrak: Itsasuko laborari baten gogoetak” liburua aurkeztuko digu. Hitzordua arratsaldeko 19:00etan duzu!!
Duela gutxi, berarekin solasean egon ginen eta horrela laburtu zigun liburuaren edukia: Basaburuko altxorrak, Basaburuko Saskiko berripaperean zazpi urtez agertu diren kronikak daude bildurik Basaburuko altxorrak liburuan.
Saskiko bezeroentzat idatzia izanak dira, baserritik hiritarrentzat beraz. Eta asmatuak izan diren kronologia berean agertzen dira liburuan.
Kronika guziek badute zerbait lotura gure nekazari auzoko bizitzarekin, Basaburuko bizitzaren lekuko eta oihartzun dira.
Jakitateak badira bi modutakoak munduan. Bata jakitate hotza, ikerlari, unibersitate eta jakintsun jauntziena. Bestea jakitate beroa, jendartearen bizitzatik eta esperientziatik eskuratzen dena, behar den bezala begirale egonez geroz. Jakitate beroa gureganatzea izan da beti gure asmoa, hainbeste baitzaukaten gure ama, aita edo aitonek. Eta gure amentsa, amentsik bagenu, bizitzaren lekukoa mezu sendoz beterik uztea edo ematea etorkizuna eraikitzeko altxatzen ari diren gazte guziei.
Mikel Hiribarrenen biografia: “Gure familia duela mende bat kokatu zen etxaldean sortua naiz 1956 an. Lapurdi Itsasuko Aroztegia baserrian, hain zuzen Basaburu deitzen den auzogune batean. Gaztetandik euskarazko artikuluak idazten aritua, Zeruko Argiako berri emaile lehenik Iparraldetik 1980a aintzinetik, eta ondotik Herriz Herri iparraldeko astekarian edo aspalditik ELB nekazari sindikataren Laborari astekarian kronika idazle. Militantzia gehiena nekazari sindikatari ematen diot, eta azken lau urtetan nago ELBren ordezkari confédération Paysanneko mahain nazionalean Parise aldean. Lanbide bakarra daukat bizitzan egunerokoa irabazteko, sortu ninduen etxaldean nekazari, beste bi lagunekin…. eta 1998az geroztik, Basaburuko hiru etxaldekin, Saskiaren sortzaile eta banatzaile. Basaburuko Saskiaren bezeroei hamabostero zuzentzen diegu argibide orri bat, aukeraz dauden ekoizpenekin, sukaldeko errezeta batekin, eta frantsesez eta euskaraz asmatzen ditugun berri artikulu xume batzuekin. Euskarazko kronika hoik dira agertzen Maiatz ek agertu berri duen liburuan: “Basaburuko altxorrak”, Itsasuko laborari baten gogoetak.”
Honatx, Sustrai Colinak Argiarako egin zion elkarrizketa.
2017/05/15 | Berriak, Maiatzaldia
Asisko Urmenetak eta Peio Etxekoparrek “Beste aldekoak” umore saioa eskainiko dute Zaldiko maldiko elkartean, maiatzaren 19an, ostiralarekin, 19.30ean.
Peio Etxekopar (Lexantzü, Zuberoa) eta Asisko Urmeneta (Iruñea, Nafarroa), bakoitza bere esperientziatik, euskalduntasunaz ariko zaizkigu. Haiek azaldu bezala, “Hain ezberdinak diren bi mundu (Frantzia-Espainia, Ipar-Hego, Hiri-Herri), zerk ditu bildu gaualdi honetan ? Eta ba ote da balizko loturarik oraino, bertaratuko den jendearekin? Duda metodikoa eta umorea lagun, denok ikasiko dugu zerbait elkarren artean. Edo ez”.
Sarrera libre izango da, aforoa bete arte.
Bestetik, maiatzaren 17an eta 18an, Baionan jarraituko du Maiatzaldiak. 17an liburu aurkezpena eta mahai inguruarekin eta 18an, irakurketa literarioa, liburu aurkezpena eta bideo emanaldiarekin.
2017/05/2 | Berriak, Maiatzaldia
Hitzaldiak, umore saioak, liburu aurkezpenak, errezitaldiak, mahai inguruak.
Iruñeko eta Baionako hainbat lekutan izango dira ekitaldiak. Iruñean: Karrikiri Euskaltzaleen Topagunean, Zaldiko Maldikon eta Kondestablearen Jauregian. Baionan: Euskal Museoan eta Zizpa Gaztetxean.
Iruñea eta Baiona arteko kultur harremanak sendotuak datoz aurtengoan. II. Maiatzaldi honetarako lagun, adiskide eta elkarte gehiago batu zaizkigu. Iruñea eta Baionaren arteko harremanak sakontzen eta zabaltzen joan nahi dugu, Maialen Lujanbiok esango lukeen bezala euskaratik eta euskaraz.
Bi hiri hauen arteko kultur sorkuntzaren eskaparatea izan nahi du Maiatzaldiak. Hitzaldiak, liburu aurkezpenak, mahai inguruak, irakurketa literarioak, umore saioa eta errezitaldiak antolatu ditugu.
Iazko Maiatzaldiak hasiera eman zion mugaz gaindiko harreman honi eta aurtengoa zabalagoa, beteagoa eta anitzagoa izanen dugu, historia, literatura, poesia eta sorkuntzari protagonismoa emanez.
Antolatzaileak gara: Iruñeko Karrikiri Elkartea eta Zaldiko Maldiko Elkartea; Baionako Maiatz Argitaletxea eta Zizpa Gaztetxea eta Senpereko Hatsa Elkartea.
Babesle ditugu: Iruñeko Udala, Nafarroako Gobernua, Eusko Jaurlaritza eta Euskal Elkargoa.
Informazio osoa jasotzeko egin klik hurrengo loturan: MAIATZ2017