Munduari bira eman zion ontzia

erakusketa

Karrikirik, Pamiela argitaletxearekin batera, Joseba Sarrionandiak idatzitako Munduari bira eman zion ontzia liburuko ilustrazioekin erakusketa antolatu du, Iruñeko Planetarioan otsailaren 21etik martxoaren 5era bitarte.

Goizetan bisita gidatuak izanen dira, Iruñerriko eskola, ikastola eta institutu desberdinetatik hurbilduko dira, guztira 350 gazte. Euskaltegietako taldeak ere bertaratuko dira.

Planetarioaren ordutegian erakusketa bisitatzeko aukera izanen da. Ares ilustratzailearen irudiz osaturiko erakusketa ederra, libururako egindako ilustrazioak pasarteekin batera aurkeztuko dira, liburuan presente dauden gaiekin, bidaiatzeko aukera eskainiz.
Erakusketa abiatzeko egunean, otsailaren 21ean, 19etan, Planetarioan bertan, Joseba Sarrionandiak, Oihane Garmendiak eta Mirentxu Oteizak liburuaren inguruko solasaldian hartuko dute parte. Sarrera librea izanen da hurbildu nahi duen ororentzat.
Liburua eskuragai duzue Xabier karrikako Karrikiri Euskal Dendan eta baita online dendan ere.

Informazio gehiago nahi izanez gero jarri gurekin harremanetan:
Karrikiri: bulegoa@karrikiri.eus / liburuak@karrikiri.eus;
Telefonoa: 948 225 845 / 695 905 607

Munduari bira eman zion ontzia unitate didaktikoa

Bi proiektu desberdin, eta aldi berean, haien artean osagarriak direnak proposatu zaizkie ikastetxe eta euskaltegi desberdinei. Bata hizkuntz adierazpenean eta bestea adierazpen artistiko eta filosofikoan oinarritutakoak hain zuzen ere, azkeneko hau Oihane Garmendiak sortuta. Mirentxu Oteizaren laguntzarekin ondu dugu proposamena. Proiektu hauek aritu dira ikasleak lantzen azkeneko asteetan. Lanketa hori eginda iritsiko dira Planetarioko erakusketara eta bertan Pamielako Juana Sanchez arituko da ongi prestaturiko azalpenak ematen.

Bigarren Hezkuntzara salto

Karrikirik sustaturiko proposamena da. Eta pausu berri bat da Karrikiriren proiektuan. Propio eta maitasunez lantzen hasi nahi dugun ildoa: gazteena.
Urte batzuk badira haurrentzako proposamena lantzen hasi ginena. Egonkortua dagoela iruditzen zaigu: haurrentzat erreferentziazko denda eta proiektuak eskaintzen ditugula, gomendioak eta zerbitzuak. Baita ospakizuna ere. Ipuingarriaren 3. edizio arrakastatsua egin dugu joan den udazkenean eta 4.a hasi gara prestatzen. Beti ere, badago zer hobetu, indartu eta zabaldu. Baina oso pozik gaude emaitzarekin. Ongi joan da eta bide emankorra izanen dela iruditzen zaigu. Badugu oraindik zer eskaini.
Haratago ere joan nahi dugu. Gazteentzako eskaintza propio hasi gara lantzen. Gazteei, haien familiei, haien ikastolei, institutuei nahi diegu eskaini eta esan Karrikirira jotzeko. Hemen liburuak lortu eta gomendioak jasotzeaz gain, ikaste prozesuan eta kultur sustapenean parte-hartze aktibo izateko gogotsu dagoen talde bat aurkituko du, geurean eta geureekin inplikatuak eta batez ere, guk sinisten dugun bezala, euskaraz eta euskal kulturan oinarritutako aukera zabala, anitza eta ona dagoela erakutsi nahi duena.

Urtetako lana eta laguntzari esker

Honaino iritsi gara lehenago aritu direnen lanari esker. Guregana hurbildu diren lagun, bazkide, erosle eta sustatzaileei esker. Bakoitzak bere modura lagundu du proiektua aurrera ateratzen, indartzen eta zabaltzen.
Eta orain bueltan gatoz gauza gehiago eskainiz. Iruñean euskaraz bizi daitekeela amesten dugun bizitza elikatzen, gogoz eta asmoz. Proiektu honekin Karrikiri bera indartuko dugula uste dugu, eta etorkizuneko fruituak emango duen artefaktoa indartzen joango dela.
Ez da aurtengorako espero dugun salto bakarra. Online dendan ere aldaketa handia egitera goaz. Dagoeneko martxan den online denda (denda.karrikiri.eus), eta inoiz baino hobeki funtzionatzen ari dena, indartzekotan gabiltza. Horretara ere iritsiko gara, eskatzen duen arreta eskainiz.

Bakarrik ezin da, eta ez dugu nahi

Proiektu hau aurrera ateratzeko jende asko inplikatu da. Pamiela Argitaletxearekin izan dugun harreman estuari esker atera da aurrera, eta baita Oihane Garmendiak eta Mirentxu Oteizak izan duten inplikazioarekin ere. Gustura gaude, eta konbentzituta gaude hori dela bidea.
Hilabete honetan bertan beste argitaletxe, elkarte eta erakunderekin batera antolatu ditugu ekimenak. Eta gehiago, eta gehiagorekin, etorriko dira.
Saretzeak indartsuago eta zabalago egiten gaitu. Eta dibertigarriago egiten du dena.
Jon Sarasuak Garabideren egitekoetako bat harizko zubiak ehuntzea dio, gurea Iruñeko euskaldunon sareak ehuntzea den bezala:
Haritxo bakar bat izaten da hasieran, etetako ere gutxi behar duena. Trentza sortzen da igual gero. Eta, onenean, zubi zintzilikario horietako baten taxua hartzen du poliki-poliki.
Ari gara gu ere horretan, sarea ehuntzen, saltoa egitera ausartzen lagunduko digun sarea trinkotzen.

Munduari bira eman zion ontzia liburuaz

«Benetako historia bat» kontatzeko eskatu dio neskato batek bere amonari, benetako historia bat behingoz, ipuin umekoiak kontatzen dizkiolako beti amonak, Historia irakaslea izan arren.
XVI. mendean munduari emandako lehenengo bira –Magallaesen eta Elkanoren itsasaldi entzutetsua– esplikatzen hasirik, neskatoaren galderek eta bainek aterako dute historia bere ildotik eta bihurtuko dute, antzinako itsas bidaia baten kronika izan zitekeena, benetako beste historia asko azaltzeko aitzakia eta bizi garen planeta arraro honi buruzko gogoeta-dialogoa.
Elkarrizketak, ez umorerik gabe, gai guztietarako giltzak eskainiko ditu: botere harremanak, gorbatak, truke ekonomiko desorekatua, kultur bestelakotasuna, botoi baten prezioa, arrazismoa, kosmosaren misterioa, memoria historikoa, lurraren propietatea, eskorbutoa, matxismoa, harrikoa egitearen garrantzia, globalizazioa…
Joseba Sarrionandiaren testua geu denon bizimoduaren baldintza historiko eta sozioekonomikoei buruzko kontakizuna da. Aresen irudiek bikainki osatzen dute hamaika urtetik ehun eta hamaika urtera arteko irakurleek goza dezaketen liburu hau.